ఎన్నికల్లో పోటీ చేస్తే ఓడిపోతా.. సల్మాన్ ఖాన్ ఆసక్తికర వ్యాఖ్యలు

బాలీవుడ్ కండల వీరుడు సల్మాన్ ఖాన్ రాజకీయాల్లోకి ఎందుకు రారనే ప్రశ్నకు.. ఆయన గతంలో చెప్పిన ఓ సరదా సమాధానం మరోసారి సోషల్ మీడియాలో వైరల్ అవుతోంది. తనకు ఎన్నికల్లో పోటీ చేయాలని ఉన్నప్పటికీ, కనీసం తన సొంత భవనం సెక్రటరీ పదవికి పోటీ చేసినా ఓడిపోతానని, తన కుటుంబ సభ్యుల నుంచే మూడు ఓట్లు కూడా రావని సల్మాన్ చమత్కరించారు.

గతంలో 'ది కపిల్ శర్మ షో'కు హాజరైనప్పుడు హోస్ట్ కపిల్ శర్మ ఈ ప్రశ్నను సల్మాన్ ముందుంచారు. "మీకన్నా ప్రజాదరణ ఉన్న స్టార్ లేరు కదా, రాజకీయ పార్టీలు మిమ్మల్ని ఎన్నికల్లో పోటీ చేయమని అడగలేదా?" అని ప్రశ్నించారు. దీనికి సల్మాన్ తనదైన శైలిలో స్పందిస్తూ "ఎన్నికల్లో పోటీ చేయాలని నాకు చాలాసార్లు అనిపిస్తుంది. కానీ మా బిల్డింగ్‌లో నాకు 8 ఫ్లాట్లు ఉన్నాయి, అందులో మూడు మావే. కనీసం మా బిల్డింగ్ సెక్రటరీ పదవికి పోటీ చేసినా నేను ఓడిపోతాను. ఎందుకంటే మా ఇంట్లో నుంచే నాకు మూడు ఓట్లు కూడా రావు" అని నవ్వులు పూయించారు.

ఇక సల్మాన్ సినిమాల విషయానికొస్తే.. ఆయన ప్రస్తుతం పలు ఆసక్తికర ప్రాజెక్టులతో బిజీగా ఉన్నారు. అపూర్వ లఖియా దర్శకత్వంలో 'మాతృభూమి' అనే వార్ డ్రామాలో నటిస్తున్నారు. 2020 జూన్ 15న గల్వాన్ లోయలో భారత, చైనా సైనికుల మధ్య జరిగిన ఘర్షణల ఆధారంగా ఈ సినిమా తెరకెక్కుతోంది. ఇందులో సల్మాన్ 16వ బిహార్ రెజిమెంట్‌కు చెందిన కల్నల్ సంతోష్ బాబు పాత్రలో కనిపించనున్నారు. ఈ చిత్రంలో చిత్రాంగద సింగ్ హీరోయిన్‌గా నటిస్తున్నారు.

దీంతో పాటు, ప్రముఖ నిర్మాత దిల్ రాజు నిర్మాణంలో, వంశీ పైడిపల్లి దర్శకత్వంలో తెరకెక్కనున్న ఓ చిత్రంలో కూడా సల్మాన్ నటించనున్నారు.